AL-MajroOoOh

ليل ياليل



ليل ياليل .. يوم النـاس سمّـوك ليـل
هو عشان السهر وإلا عشان المنام ..؟
شف عيوني وشف وشلون جسمي نحيل
لعنبو هالغرام إن كان هذا الغـرام ..!
آه ياقلبـي اللـي مابقـى فيـك حيـل
من كثر ماطواك الشوق ولـد الحـرام
قلت لك لاتميـل إن طعتنـي لاتميـل
بس هذا أنت ملت وماسمعـت الكـلام
يـوم ذيـك الصبيـة أم ذاك الجديـل
جت تهادى وتمشي مثل مشي الحمـام
إنكسرت وقعدت تحـط فـيّ وتشيـل
لين رحت وخذتني في طريـق الهيـام
قبل أسلم عليهـا كنـت عابـر سبيـل
وصرت ديرة غرام وعشق بعد السلام
كنت اقول : أي حب وأي خل ٍ وخليل
الهـوى مـاوراه إلا التعـب والمـلام
لكن اليوم شفني ضعت وأكبـر دليـل
اني امشي واهذري( إبتسام .. إبتسام )

AL-MajroOoOh

جدة



ياللي تقـول الـدار داري وتختـال
ماشفت جده كيـف لاروح عصيـر
تبغى الصراحه كلمة الحـق تنقـال
جده بحرها غير وجروحهـا غيـر
جده سواحل عشق وأحـلام وآمـال
وأسوار طيش وذكريـات ومقاديـر
جده وش أكتب عنك واللي على البال
أرق وأعذب مـن قصيـد وتعابيـر
أكتب عن جروح وتواريخ وأجيـال
ولا عن أحـلام وقصيـد ومشاويـر
تدرين باكتب وأترك العشـق ينهـال
عن جادل تامر على الصعب ويصير
أسج وأذكر عودها كـل مـا مـال
كنه يطيّر من ضلوعـي لهـا طيـر
وأذكر شعرها لاانتثر ينثـر ألحـال
وتلمه بـشال عرف يمسـي بخيـر
واذكر نسيم عذب كم عـذّب الشـال
لا طار به والشـال مـاوده يطيـر
واذكر نهـارٍ دمعهـا بآخـره سـال
نهـار أحزانـه علـيّـه طوابـيـر
نهـار أدك بضيقتـي راحـة البـال
وأقول ياجـده تمسّّـي علـى خيـر

AL-MajroOoOh

\\ يا صاحبي \\




ياصاحبـي واللـي ورى ضيقـة الـبـال


..... له يمكن أكثر من سنه فـي مكانـه


أزريـت لاآقولـه وهـو صعـب ينقـال


..... والأصعب اكثر لو تركتـه وشانـه


الصمـت وافـي لكـن المشكلـه طــال


..... وأن طوّل اكثر بأعتبرهـا خيانـه


الـى متـى وأنـا علـى نفـس هالحـال


..... ان جاد صوتي قلت ماهوب أوانـه!


مليـت اداري خـطـر الـنـاس الأزوال


..... حتى ملت صدري جـروح الميانـه


ياصاحبـي كـم لـي وأنـا ودي أحتـال


..... على همومي لكن ! , (الشعر أمانه)


ألقـاه غـيـر إذا تـسـاون الاقــوال


..... ويلقاني الضلع ان سعوا في طمانه


اذا كتبـتـه أشـعـر ان الـتـعـب زال


..... واذا قرانـي نـال قـدر ومكانـه


وانا التعـب فينـي مـن الجـال للجـال


..... يكبر ويبقـى طيشـه وعنفوانـه


هـذي سنـه وأنـا مجاهـيـم الأنــذال


..... تدك صدري , بين جهـل ولعانـه


ياقلهـم وقــت الشـدايـد والأهــوال


..... وياكثرهم وقت الرخـاء والليانـه


رح قلهـم ياصاحبـي طـيـب الـفـال :


.....(عن الشجاع اللي يورد حصانـه)


وعن سيفـه الساطـي وحـده ليـا مـال


..... ماضي ولكن من يسله عشانـه !!؟


وأطيبهم اللـي لا غـدت صلـف وثقـال


..... حملي على متني ..وحمله وزانـه


ياصاحبـي صبـرك علـي تــو لا زال


..... عندي كلام وودي أطلـق عنانـه


تبـي تعـرف اللـي ورى ضيقـة البـال


..... اللي له أكثر من سنه فـي مكانـه


عان الشجـر طايـح ولا حولـي ظـلال


..... الا ظلالي يقهر الشمس شانـه !


والأرض ضاقت وأنكـرت وجـه رجـال


..... غريب وأكثر غربته من زمانـه